شب یلدا

یلدا مبارک/درس یلدا
➖➖➖➖➖➖➖➖➖➖✔️

شویِ یلدا هم آخر انه شونه
زمستون فصلِ دیگر انه شونه
پئیز وزمستون اََیْ بونه بهار
رفاقت و مردی دلِ ارمونه// (امه عمره که دره انه شونه)
➖➖➖➖➖✔️✔️✔️

چه فرق کنده برار شو چنده باشه
مهم اینه امه لب خنده باشه
خنده اون روز خاره ظلمی نواشه
آدم خدایِ خاره بنده باشه
➖➖➖➖➖➖➖✔️✔️✔️

انده نعو بلنده شوی یلدا
بلند تر از وه هسه روزه فردا
انده بلنده فردای قیامت
بلند تر از هزارون سال دنیا

➖➖➖➖➖➖➖✔️✔️✔️✔️✔️

بلنده شو بمو فردا ره یاد دار
عدالته جانه خداره یاد دار
اتی فکر قیامت هاکن امشو
اتی شه ببا وننا ره یاد دار
➖➖➖➖➖➖➖✔️✔️

اگر گنه امشو مثال بهووی
باشب چره فکره شه مال دهووی
از اینها بهتر اینه مرد عاقل
یاد محشر وقیل وقال دهووی
➖➖➖➖➖➖➖➖✔️✔️✔️✔️✔️

سوغاتی امشو اغوزه نونه
سیو حلوا وهم تندیره نونه
مره بعو سوغات فردا چیعه
اونجه هیچکس غمخوار توسه نونه

➖➖➖➖➖➖➖➖➖✔️✔️

اسا که قراره بیدار بواشیم
شوی یلدا دهیعه یار بواشیم
چنده خاره صله رحم هاکنیم
خاک پای شه جانه مار بواشیم

➖➖➖➖➖➖➖➖✔️✔️✔️✔️✔️

(صفا) شادیه اَمْشو ، لب ره گاز بَیْ
شعر شادی بعو اتی ته ساز بَیْ
هیچ کس پیدا ننه این ره ندونه
شِوِسّه ، خارکه همدمه راز بَیْ

شاعر قاسم جناتیان قادیکلایی

---

نوشته شده در تاريخ دوشنبه بیست و هفتم آذر ۱۳۹۶ توسط سيد مجتبي حبيبي مداح

ذرية زهرا سلام الله عليها...